قصائد للأمام على

عدينه الليالي السود وطبع اسنين خيوله مسابگ
ضرب محاط جرحي اشبيه جرحي امن اللجم غمگ
وكيحه الدنيه صلفت عين تجفي بساع من تعشگ
جفت من سال دم هابيل اوضاعت كلمه اسمه الحگ
خناجر طعنت التاريخ من دم الخيانه ثوبه ملثگ
محمد بالوداع شكال مو اعلنه طك ابطگ
رفع ايده او هتف بسمه علي الرايه علي الايه علي بحر العلم وغمگ
علي بسمه انتخه اسماعيل طك البير ماي ازرگ
علي او لوماتدارك نوح جا غط والسفينه اشراعه شكگ
علي صولاته مشهوده علي فاز الحضه بجوده
علي كَبل الخق مخلوق او شاراته علي ابكل حين جم حاقد حقير ابحضرته اتعلگ
وحنه انكول مادام الصكر موجود خله ايوطوط اللكَلكَ
او نرد انكَول جلمة حك كلمن عاده ابو الحسنين الف نعلع لبيه منين ما ينتگ


للشاعر عملاق الشعر الشعبي
عريان السيد خلف





يبو الحسنين اجيتك والكلب مهضوم
واريد انخاك نخوة عرب يل بلكرم ماثور
وحاشاك و تردلك سايل ومحتاج
وماخاب اليطب الحضرتك ويزور
أجيتك سيدي واحضنته للشباج
واحس روحي بعجابة وبالضريح اتدور
شفت دمعات حزنانة وتريد مراد
وشفت ناس التهلهل ومنهه توفي انذور
وجن صوت الضمير بحضرتك مغتاظ
يصيح بعالي صوته يريد چن يثور
علي باب الحوايج قاضي الحاجات
علي منهل عذب منة تفيض بحور
علي صوت الرسالة ومنبر الاسلام
علي تاريخ والتاريخ بيه مشهور
علي سيف الفقار ورافع الرايات
علي بكل المعارك اخذ اعظم دور
علي نهج البلاغة وعلم للاعلام
علي بحر العلوم الماتلمة اسطور
طلعت من الصحن واهتف بعالي الصوت
تظل دومك مجد وللشيعة اعظم سور
استحة بيت الشعر منك يا ابو الحسنين
وسجد حتى القلم ظل حاير ومبهور
وسجد حتى القلم ظل حاير ومبهور.

علي بطاري اسمك عيون اليتامة تنام
بس يغفن بالمهن والجفن يدمع
يتامه بطونهم مالكت حل للجوع
والمايلكة حل من الصعب يقنع
علي منين ابتدي وانته تعرفهن زين
علي الشباج اسئلة شكد قصص يسمع
علي كون بعهد جنت انته تحكم بي
ترتد العقارب والزمن يرجع
ولو مودوم لو بس ثانية كدما
الايتام الجياع من الخبز تشبع
لان ماتطعم اللكمة بمقابل صوت
ماتنطيهه مرة ومرة لاتجزع
على ماجان الك يد بتجارة ومال
علي عن كل هذني من الذكر ترفع
علي ماخصصت لاجل الدعاية اموال
ماوصيت قنبر بالورق يدفع
علي اعذرني علي بس للسؤال اسباب
علي بره العراق اتملكت مصنع ؟؟
تجل لوهيجي مااعرضت عن كفار
ولاوية ابن عمك بالامر تصدع
علي يم سيفك اتنشز سيوف الغير
ويبين الطافي من الصدك يلمع
علي كون الشعر مووحي بكيفي ايصير
جاكل القصايد بس الك تطلع
وجاماكتب قلمي بغير حبك بيت
الى ان احرف اسمك بالقلم تطبع
علي لومالكينه ورق نكتب بي ؟؟
علي نلكه البديل من الجلد نشلع
علي كون القصيدة الالك بيهه ابيات
علكد مابليلك تسجد وتركع
وكون ايزخ صور غيم الخيال وياي
الى ان كل ورقتي من الشعر تنكع
وماحط بيت بيهه سد فراغ ايصير
الما ماخذ مكانه من السهل يطلع
علي ليك القصيدة غيره بيهه تكون
بس انكلهه بسمك علقلم تفزع
تسمعهه المنصه وتنحني منتشوف
علي بيهه احتراما والخشب يخشع
تتمسى قصيدة لو فقط بس بيت
ماينقصهه تكمل لو بقت مقطع
ماتخضع نقد تملك حصانه شلون
علي موجود بيهه وللنقد تخضع ؟؟
لو يدري علي بيهه غلط موجود
جامن البداية ماقبــــــــــــــل تطلع